Oppdatering om Politihelikopter
Grunna operative årsaker har Politiets Helikopterteneste informert oss om at dei dessverre ikkje har høve til å delta på Stord Airshow som planlagd.
Informasjon til besøkande pilotar
Det er innført PPR for alle besøkande luftfartøy inn til Stord lufthamn laurdag 31. mai. (MyPPR vert ikkje nytta denne dagen) *** Ta kontakt innan 30. mai for tildeling av slot: E-post: LTT@stordlufthamn.no *** Flygarar som ikkje har førehandsavtale om PPR-slot innan 30. mai risikerer å bli bli avvist. *** GA-trafikk må ankomma lufthamna tidleg (innan kl.10:00 lokal tid) av hensyn til parkering. *** Alle flygarar oppfordres til å levera flightplan både inn og ut av lufthamna. *** Forvent forseinkingar ved avgang, då det er mange som skal ut att etter arrangementet.
Safari og Spirit til Stord for fyrste gong
Luftforsvarets Flygeskule bekrefter at dei planlegg å delta på Stord Airshow med eit treningsfly av typen SAAB MFI-15 Safari. Flyet nyttast til opplæring av militære pilotar og er til vanleg stasjonert ved Bardufoss Flystasjon. Laurdag 31. mai kjem flytypen for fyrste gong til Stord for å visa seg fram i lufta for publikum. Heile vegen frå Tsjekkia kjem to sportsfly som vil ta del i den statiske utstillinga på bakken. Begge flya er av typen Ellipse Spirit og kjem i regi av flyprodusenten Ellipse Aero sine representantar, mellom anna selskapets testflygar, som vil promotera flya under Stord Airshow.
Underhaldning for dei minste
Under Stord Airshow blir det underhaldning for dei yngste på bakken. Sjølvaste BRANNBAMSEN BJØRNIS kjem kl. 11:30 og det blir anledning å helse på han for alle som vil. Dessutan kan me tilby gratis HOPPESLOTT! I år har me to hoppeslott som vil vera opne under heile arrangementet. Desse er levert av Fitjar Kraftlag og Johannesen Entrepenør AS.
Pass på hørselen
Det blir mykje støy under eit flystemne, og enkelte av flya som er venta til Stord Airshow produserer eit lyd- nivå som kan vera skadeleg for hørselen. Me oppfordrer difor alle om å passa godt på øyrene. Me vil dela ut gratis øyreproppar så langt lageret rekk, og det vil og bli sal av øyreklokker for born til kr. 100,- Desse kan kjøpast i kioskane våre. Har du eige hørselsvern, anbefalar me at du tar det med.
Vampire og Bergen Aero Klubb til Stord Airshow
Flyvåpenets Historiske Skvadron kjem til å fly oppvising med ein DeHavilland Vampire under Stord Airshow. Flyet har vitja lufthamna fleire gonger tidlegare i samband med slike arrangement. Frå før deltek den historiske skvadronen og med ein MiG-15. Bergen Aero Klubb har bekrefta at dei ønsker å visa fram ei oppvising med ein innleigd Super Decathlon. Flyet nyttast til aerobatisk trening og tilhøyrer Sameiet Super Decathlon ved Trondheim lufthamn – Værnes.
Safir og Storch til Stord Airshow.
Frå Stavanger lufthamn – Sola kjem til saman tre fly som alle vil ta del i flyprogrammet under Stord Airshow 2025. Først ut har me to SAAB Safir frå Sola Flystasjon Flyklubb, som vil flyga oppvising i formasjon. Flytypen vart nytta som treningsfly for Luftforsvaret i perioden 1956-1988. I tillegg kjem flygar Leidulf Heskje til Stord med sin historiske Fieseler Storch. Flyet vart nytta av tyske Luftwaffe under andre verdskrig, og kjem altså til Stord for fyrste gong laurdag 31. mai.
Modellfly varmer opp til flyprogrammet.
Fly kjem i mange storleikar, og blant desse finn ein modellfly i ulik skala. Under Stord Airshow vil både Bergen Modellflyklubb og Haugaland Modellklubb visa fram fleire av sine modellar, både på bakken og i lufta. Eit av høgdepunkta blir etter planen ein BAe Hawk turbinmodell i 1:4 skala (bilete) som vil driva flyoppvising. Flytypen nyttast av fleire oppvisingsteam, mellom anna britiske Red Arrows. Modellen som kjem til Stord Airshow er nærare 3 meter i lengde, og har ei vekt på nesten 20kg.
Redningshelikopter frå Luftforsvaret.
Luftforsvarets 330 skvadron planlegg å fly ein demonstrasjon med eitt av sine AW101 redningshelikopter under Stord Airshow. Helikoptertypen, som i Noreg har fått tilnamnet “SAR Queen”, vart fasa inn i teneste i 2020, og har no erstatta Sea King helikopterene. AW101 er produsert av Leonardo i England og Italia, og totalt 16 slike helikopter er i teneste ved 330 skvadronen. Deltakinga under Stord Airshow kjem med atterhald om endring grunna operative eller vêrrelaterte årsaker.
Bjørnis kjem til Stord Airshow!
Det er ikkje berre i lufta det blir action under Stord Airshow 2025. Det blir og underhaldning for dei yngste på bakken. Sjølvaste Brannbamsen Bjørnis kjem til Sørstokken og det blir anledning å helse på han for alle som vil. Bjørnis er tidenes største satsing på brannførebyggande kommunikasjon med born som hovudmålgruppe. Prosjektet bygger på tanken om at brannvernopplæring for born er ein av grunnpilarane i brannførebyggande arbeid.